TÄZE KITAP — TOÝ SOWGADY
Hasyl toýunyň bosagasynda hoş habar — S.A.Nyýazow adyndaky Türkmen oba hojalyk uniwersitetinde taýýarlanan «Agrosenagat toplumynyň durnukly ösüşi» atly sanly ulgam arkaly geçirilýän halkara ylmy-amaly maslahatyň nutuklarynyň gysgaça beýany» atly kitabyň giň okyjylar köpçüligine gowuşmagy baýramçylyga mynasyp sowgat boldy. Täze neşirde Gahryman Arkadagymyzyň, Arkadagly Gahryman Serdarymyzyň oba hojalyk özgertmeleri, agrosenagat toplumynyň durnukly ösüşi giňişleýin beýan edilýär.
Kitap Türkmen döwlet neşirýat gullugynda taýýarlanyp, onda halkara ylmy-amaly maslahatyň «Agronomçylyk, bagbançylyk we ekologiýa» atly I bölümine, «Agrosenagat toplumynda ykdysadyýet we dolandyryş, ynsanperwer, matematika ylymlary, agroinženerçilik» atly II bölümine, «Azyk senagaty, suw hojalygynda innowasion tehnologiýalar, zootehniýa we weterinar lukmançylygy, ýeňil senagat» atly III bölümine gatnaşyjylaryň nutuklarynyň gysgaça beýanlary ýerleşdirildi. Olaryň türkmen, iňlis we rus dillerinde bolmagy, maslahata gatnaşyjylaryň arasynda daşary ýurtlaryň wekilleriniň hem bolmagy halkara ylym-bilim gatnaşyklarynyň ösüşlerinden habar berýär.
