Daşary ýurt wekiliýetleriniň we mekdep okuwçylarynyň Türkmenistana eden sapary wagtynda ýeňijileri sylaglamak dabarasy
Türki medeniýetiniň halkara guramasy (TÜRKSOÝ) tarapyndan 2024-nji ýylyň «Türki dünýäsiniň beýik şahyry we akyldary Magtymguly Pyragy» we Änew şäheriniň «Türki dünýäsiniň medeni paýtagty» diýlip yglan edilmegi mynasybetli, türki dünýäsiniň düzme ýazmak ussatlygy boýunça we ýaş suratkeşleriniň halkara bäsleşikleriniň ýeňijilerine 2024-nji ýylyň 16-njy noýabrynda baýraklaryň gowşurylyş dabarasy boldy.
2024-nji ýylyň «Türki dünýäsiniň beýik şahyry we akyldary Magtymguly Pyragy» diýlip yglan edilmegi mynasybetli geçirilen düzme ýazmak ussatlygy boýunça halkara bäsleşigiň ýeňijileri yglan edilip, bäsleşige gatnaşanlardan ýurdumyzyň Balkan welaýatynyň Gyzylarbat etrabynyň 4-nji orta mekdebiniň 11-nji synp okuwçysy Gülendam Rahymowa I orna, Etrek etrabynyň 3-nji orta mekdebiniň 10-njy “A” synp okuwçysy Mährijemal Begjanowa II orna, Mary şäheriniň 24-nji zehinli ýaşlar mekdebiniň 11-nji “A” synp okuwçysy Tumar Aşyrowa III orna mynsyp bolmagy, 2024-nji ýylyň Änew şäheriniň «Türki dünýäsiniň medeni paýtagty» diýlip yglan edilmegi mynasybetli ýaş suratkeşleriň halkara bäsleşiginde Mary welaýatynyň Ýolöten etrabynyň 29-njy orta mekdebiniň 12-nji “A” synp okuwçysy Durdymyradowa Mähriban I orna, Sahy Jepbarow adyndaky Arkadag şäher ýörite sungat mekdebiniň 1-nji ýyl talyby Gülnabat Annanurowa II orna, Balkan welaýatynyň Balkanabat şäheriniň 19-njy orta mekdebiniň 11-nji “A” synp okuwçysy Begenç Hojagulyýew III orna mynasyp bolmagy başardy. Şeýlelikde, türkmenistanly ýaşlar bäsleşikleriň iki görnüşi boýunça-da üstünlikli çykyş edip, I-II-III orunlaryň ählisi boýunça ýeňiş gazandylar. Bu bolsa Türkmenistanyň umumybilim babatdaky maksatnamalarynyň bäsleşige ukyply ýaş nesliň terbiýelenip ýetişdirilmegine gönükdirilendiginiň, ýaş nesliň bilimleri özleşdirmek babatda dünýäniň beýleki ösen döwletleriniňkiden birjik-de pes oturmaýandygynyň ýene-de bir gezek halkara ykrarnamasy boldy.
Şonuň ýaly-da, daşary ýurt döwletlerinden Türkiýeden, Gazagystandan, Gyrgyzystandan, Özbegistandan wekilçilik edenler düzme ýazmak boýunça bäsleşikde 3 sany I orun, 4 sany II orun, 4 sany III orun, ýaş suratkeşleriň halkara bäsleşiginde bolsa 3 sany I orun, 3 sany II orun, 4 sany III orun gazandylar.
Daşary ýurt döwletleriň wekilleriniň we mekdep okuwçylarynyň Türkmenistana saparynyň çäklerinde geçirilen bu halkara bäsleşikleriň ýeňijileri ýörite Diplomlardyr gymmatbahaly sowgatlar bilen sylaglandylar
